Fredrik Wiig Sørensen

Utstilling i Ulsteinvik. Amfisenter 2. etg.
Opnar torsdag 17. mars kl. 18.00–19.00, og varar til laurdag 2. april 2022.

Utstilling

Torsdag 17. mars opnar Ulstein kunstlag ei spennande utstilling med kunstnaren Fredrik Wiig Sørensen i lokala i andre etasje på Amfi. Sørensen er opphavleg frå Ålesund, men bur no i Bergen. Han har hatt fleire utstillingar ulike stader i landet, og no er endeleg turen komen til Ulsteinvik.

Bileta Sørensen stiller ut, er oljemåleri på lerret og oljepastellar på papir. Dei er figurative og søkjande i uttrykket, og bakgrunnen hans innanfor filosofi speler tydeleg inn i arbeidet med motiva. Gjennom kunsten utforskar han både det menneskelege og det åndelege i eit spenn mellom absurditet og rasjonalitet.

Dei siste åra er det fleire og fleire som har fått auga opp for bileta til Fredrik Wiig Sørensen, og då eine biletet hans i fjor vart plukka ut til å vere plateomslag for debutplata til Girl in Red, nådde kunsten hans ut til endå fleire. Førehandsinteressa for utstillinga i Ulsteinvik kan tyde på at det òg her i området er mange som har fått sansen for kunsten til Sørensen.

Utstillinga er elles open:
Torsdag 24. og 31. mars kl. 15.00–19.00
Fredag 18., 25. mars og 1. april kl. 14.00–17.00
Laurdag 19., 26. mars og 2. april kl. 11.00–16.00