Utstilling i Ulsteinvik. Amfisenter 2. etg.
Opnar torsdag 2. september kl. 18.00–19.00, og varar til laurdag 18. september 2021.

«Fragment av forteljingar»

2. september opnar ei ny utstilling i regi av Ulstein kunstlag på lokale i 2. etasje på Amfi. Denne gongen er det to kunstnarar med kvart sitt eige utrykk, veldig forskjellige i teknikk, men kanskje litt like i tema? 

Arnfinn Mork-Stordal jobbar med tresnitt, gjerne i stort format. Trykka hans viser ikkje berre fine komposisjonar, men vitnar også om gode ferdigheiter med knivar når han jobbar nøyaktig med å skjere motiv i treplater for å kunne trykke dei etterpå. Han har utdanning frå Oslo tegne- og maleskole og Statens håndverks- og kunstindustriskole i Oslo, og har deltatt på ei rekke utstillingar, nyleg i Kunsthuset i Ørsta. Han er medlem i kunstnarfellesskapet Aggregat i Ålesund. 

Arnfinn er opptatt av det narrative, om det å vere menneske, der alle har si historie av siger og nederlag, av sorg og glede, og ein lengsel etter kjærleik og tilhørigheit. Arnfinn lagar ofte komposisjonar samansette av menneske i ulike settingar, der handlinga gjerne utspelar seg ut frå val eller feiltrinn som kanskje får varige konsekvensar for resten av livet. “Det å bruke menneske i komposisjonar for bilda mine (tresnitt) kan kanskje også lære meg noko”, seier Arnfinn, “om mogleg å komme nærmare meg sjølv." 

Cecilie Lid Hole har etter fleire års opphald med kunstnarisk verksemd tatt opp att penselen seint 2020. Ho har utdanning frå Ålesund kunstfagskole og ein bachelor i kunst og handverk frå Høgskulen i Volda. Ho har hatt ein god del separatutstillingar og deltatt på fleire kollektivutstillingar. 

I verkstaden på Hareid lagar ho fargerike, mixed-media-bilde og skulpturar som er inspirerte av street art og undergrunnskultur. Ho miksar gjerne mange sjangrar og leikar seg med ulike teknikkar. Dei fleste bilda har innslag av ulike papir, garn og lakk. Ofte har desse kunstverka ein nerve eller ein politisk bodskap, men Cecilie ønsker ikkje å gi for mykje info om kva som er tanken bak, slik at verka kan stå opne for tolking. 

Utstillinga er open til 19. september.

Utstillinga er elles open:
Torsdag 9. og 16. september kl. 15.00–19.00
Fredag 3., 10. og 17. september kl. 14.00–17.00
Laurdag 4., 11. og 18. mars kl. 11.00–16.00